Border 2 Movie: Jab Ek Chitthi Khushi Laati Hai Aur Doosri Maatam

Border 2: Ek Aisi Kahani Jo Dil Ko Chhoo Jaati Hai

Kabhi-kabhi koi film sirf screen par nahi chalti, balki seedha dil ke andar utar jaati hai. Border 2 bhi kuch aisi hi film hai. Yeh kahani sirf jung ki nahi hai, balki dosti, maa, parivaar aur balidaan jaise jazbaaton ki hai. Film ke kai scenes aise hain jo dekhte waqt aapko chup rehne par majboor kar dete hain aur aankhen nam ho jaati hain.

Is blog mein main Border 2 ke un scenes ke baare mein baat kar raha hoon jo mujhe sabse zyada dil se jude hue lage. Yeh koi kitabi review nahi hai, balki ek aam darshak ke jazbaat hain jo film dekh kar mehsoos hue.

Dosti, Khushi Aur Gham Ka Sangam

Film ka ek sabse bhavuk scene tab aata hai jab ek fauji ko ghar se chitthi milti hai. Chitthi mein likha hota hai, “Mubarak ho veerji, aap baap ban chuke hain, beti hui hai.” Is khabar se woh khushi se jhoom uthta hai aur apni khushi apne dost ke saath baantne ke liye daudta hua uske paas pahunchta hai.

Image Credit: Border 2 movie still © T-Series Films & J.P. Films (Produced by Bhushan Kumar, Krishan Kumar, J.P. Dutta & Nidhi Dutta)

Lekin jab woh apne dost ko dekhta hai, toh pata chalta hai ki woh ro raha hai. Puchhne par dost rote hue batata hai ki uski maa kal raat guzar gayi. Is pal par naya baap banne wala fauji apni khushi chhupa leta hai. Woh chitthi ko apne paas rakh leta hai aur dost se kehta hai ki chalo ghar chalte hain, maa ki chita ko aag dete hain. Military ka incharge humein jaane ki ijazat de dega.

Is par dost kehta hai ki woh kahin nahi jaayega. “Main ek maa ko kho chuka hoon, ab main apni is maa ko nahi khona chahta,” woh kehta hai—yahan maa se uska matlab Dharti Maa hota hai. Yeh sun kar dono aur zyada bhavuk ho jaate hain.

Naam Mein Chhupi Yaadein

Isi scene mein fauji apne dost se uski maa ka naam puchta hai. Dost batata hai, “Parvati Devi.” Tab fauji kehta hai, “Main bhi apni beti ka naam Parvati rakhunga—teri bhatiji ka naam Parvati hoga.” Yeh sunte hi dono ki aankhen khushi aur gham ke milan se bhar aati hain. Yeh scene film ki writing aur emotion ki taakat ko dikhata hai.

Border 1 Aur Border 2 Ka Tulna

Yeh baat maanni hogi ki Border 1 aur Border 2 ka seedha comparison karna theek nahi. Border 1 apne daur ki ek aisi film thi jismein ladai itni real lagti thi jaise sab kuch aankhon ke saamne ho raha ho. Us film ka apna ek alag hi asar tha.

Border 2 aaj ke daur ki film hai. Shayad yeh Border 1 ka record na tod paaye, lekin is film mein mehnat aur jazba dono saaf nazar aate hain.

Sunny Deol Aur Beta: Vidai Ka Dard

Film ka ek aur dil chhoo lene wala scene Sunny Deol ke kirdaar se juda hai. Unka beta bhi army mein hota hai. Maa nahi chahti thi ki woh fauj join kare, kyunki woh unka eklauta beta hota hai.

Ek din ghar par bete ki chitthi aati hai, jismein woh maa-baap ko pyaar bhari baatein likhta hai. Sunny Deol chitthi padhte hue darwaze ki taraf badhte hain. Tabhi darwaze par dastak hoti hai. Bahar teen military officers khade hote hain, jo unke bete ke shaheed hone ki khabar dete hain. Isi pal maa bhi darwaze tak aa jaati hai.

Ek taraf bete ki pyaar bhari chitthi, aur doosri taraf uski maut ki khabar—khushi ka mahaul pal bhar mein matam mein badal jaata hai. Yeh scene dekh kar har maa-baap ka dil kaanp uthta hai.

Background Music Aur Jazbaat

Film ke kuch aur scenes bhi kahani ko aur mazboot bana dete hain. Jab radio par achanak jung ki khabar aati hai aur sabhi fauji ladai ke liye nikal padte hain, us dauran dheemi awaaz mein Border ka iconic gaana background mein chalta rehta hai. Faujiyon ki vidai ke saath woh sangeet dil tak pahunch jaata hai. Is ehsaas ko shabdon mein bayaan karna mushkil hai.

Star Cast Ka Farq

Agar Border 1 ki baat karein, toh usmein Suniel Shetty, Akshaye Khanna, Jackie Shroff jaise damdaar kalakaar the. Star cast itni zabardast thi ki screen par aate hi aankhen thahar jaati thi.

Is baar ki casting aur pehle ki casting mein kaafi antar hai. Agar Border 2 ki star cast bhi Border 1 jaisi dhurandhar hoti, toh shayad yeh film bhi saare record tod deti.

Antim Vichaar

Border 2 ek aisi film hai jo housefull jaane ki poori sambhavna rakhti hai. Main khud yeh film dobara dekhne jaane wala hoon. Film humein yeh sandesh deti hai ki zindagi mein kuch bhi bano, lekin pehle ek achha insaan bano. Aur agar mauka mile, toh desh ki seva ke liye military join karo.

Hum apni zindagi mein jaane-anajaane kai galtiyan karte hain, jinka praayashchit shaayad zinda reh kar poora na ho, lekin desh ke liye shaheed hokar zaroor ho sakta hai.

Asha karte hain ki aapko yeh blog pasand aaya hoga. Film aur bhi zyada pasand aayegi—zaroor dekhein Border 2 aur is film ko support karein.