Cheekatilo(2026) Movie Explained – Gunaah Jo Saalon Baad Laut Aaya

Movie Credit: Cheekatilo | Produced by D. Suresh Babu (Suresh Productions Pvt. Ltd.) | All rights reserved to original creators.

Bachpan… jab zindagi sabse zyada nazuk hoti hai. Usi daur me Ramanund ke maa-baap ek accident me chal baste hain. Us waqt Ramanund sirf 10 saal ka hota hai.

Maa-baap ke jaane ke baad, usse uske chacha-chachi apna le lete hain. Bahar se yeh ek naya ghar lagta hai, lekin andar hi andar ek aisi kahani pal rahi hoti hai jo aage chal kar khoon aur dard me badal jaati hai.

Ramanund ki chachi behad khoobsurat hoti hain. Woh ek kathak dancer hoti hain — hamesha ghungroo pehne, dance karti hui, aur students ko kathak sikhaya karti hain.

Image Credit: Isha Chawla (South Indian Actress) | Image used for review & informational purposes only.

Par khoobsurti ke peeche ek sach chhupa hota hai. Chachi ka chaal-chalan theek nahi hota.

Jab Ramanund 20 saal ka ho jaata hai, to chachi ki nazar us par badalne lagti hai. Woh usse chedne lagti hain, uske kareeb aane ki koshish karti hain, aur dheere-dheere had paar karne lagti hain.

Ramanund yeh sab samajhta hai, par chup rehta hai. Woh chachi ko izzat deta hai, lekin chachi apni jawani aur khwahishon par kabu nahi rakh paati.

Woh Raat

Phir ek raat aati hai. Chacha ghar par nahi hote.

Chachi — jinki umr lagbhag 37 saal hoti hai, aur jo aaj bhi utni hi kamsin aur khoobsurat dikh rahi hoti hain — apne armaanon par kabu kho baithti hain.

Woh Ramanund ke kareeb aati hain, aur zabardasti karne lagti hain.

Tabhi achanak chacha ghar aa jaate hain. Aur jo woh dekhte hain, use samajhne ka mauka bhi nahi milta.

Sach saamne aane se pehle hi chachi poori baat palat deti hain. Woh Ramanund par ilzaam laga deti hain — ki usne zabardasti karne ki koshish ki.

Gusse me chacha belt nikaalte hain aur bina kuch sune Ramanund ko maarna shuru kar dete hain.

Ramanund cheekhta hai, rota hai, samjhata hai — “maine kuch nahi kiya, mujh par yakeen kijiye.”

Lekin chacha ek shabd nahi sunte. Maar jaari rehti hai.

Aakhir gussa Ramanund par haavi ho jaata hai. Woh chacha se belt cheen leta hai aur palatkar vaar kar deta hai.

Chacha kamzor pad jaate hain, zakhmi ho kar gir padte hain, aur kuch hi der me unki saansein tham jaati hain.

Us raat ka anjaam aur bhi bhayanak hota hai. Chachi bhi zinda nahi bachti.

Andhera Yahin Se Shuru Hota Hai

Chachi ki maut ke baad bhi Ramanund ka gussa kam nahi hota.

Ab uske liye ghungroo sirf ek awaaz nahi hote — woh uske zakhmon ki yaad ban jaate hain.

Jo bhi aurat usse ghungroo pehne dikhai deti hai, Ramanund uska peecha karta hai. Kuch ko zinda chhod deta hai, kuch ko maut de deta hai.

Waqt ke saath woh kai auraton ki zindagi barbaad kar chuka hota hai.

Bobby Murder Case

Kahani me naya mod tab aata hai, jab film ki heroine Sandhya ki jigri dost Bobby aur uske boyfriend ka murder ho jaata hai.

Yeh murder Ramanund karta hai.

Media is khabar ko sach se zyada masale ke saath dikhata hai. Headline banti hai —

“Boyfriend ke saath sambandh ke dauran patrakar Bobby ki maut”

Sabse dardnaak baat yeh hoti hai ki yeh news usi channel par dikhayi jaati hai jahan Bobby khud kaam karti thi.

Sandhya Aur Sach

Sandhya apni dost ke liye ladti hai. Woh sach ki parat-dar-parat kholti hai, aur Ramanund ke andhere chehre ko saamne laati hai.

Yahi is crime thriller ki kahani hai — jo sirf daraati nahi, balki sochne par majboor kar deti hai.

Aakhri Raaz

Jab Bobby ka murder hota hai, tab Ramanund ki umr lagbhag 50 saal hoti hai. Woh jawani me hi khoon karna chhod chuka hota hai.

To phir aakhir kaunsi wajah thi jisne use dobara is raaste par laa khada kiya?

Is raaz ko jaanne ke liye film dekhna zaroori ho jaata hai.

🎬 Cheekatilo Movie Cast

Ye film ek Telugu crime-suspense thriller hai, jo Prime Video par 23 January 2026 se stream ho rahi hai.

👥 Main Cast

• Sobhita Dhulipala — Main role (Sandhya)
• Viswadev Rachakonda — Lead role
• Chaitanya Visalakshmi
• Esha Chawla
• Jhansi
• Aamani
• Vadlamani Srinivas
• Ravindra Vijay
• Suresh

📌 Film ka direction Sharan Kopishetty ne kiya hai aur iska production Suresh Productions Pvt. Ltd. ke dwara hua hai.